Фото: shutterstock
Жаңа 2026 жылдың басталуымен бірге Қазақстанда бірқатар мемлекеттік төлемдер мен қызметтердің құны қайта есептелмек. Бұған негіз – айлық есептік көрсеткіштің (АЕК) өсуі, деп хабарлайды Qazaq.Today ақпарат порталы.
АЕК – салықтар, айыппұлдар, әлеуметтік төлемдер мен мемлекеттік баж салығы секілді көптеген қызмет түрлерінің құнын есептеуге арналған негізгі көрсеткіш. 2026 жылы бұл көрсеткіш 3 952 теңге болып бекітілді. Бұл – 2025 жылғы 3 450 теңгемен салыстырғанда 14,5%-ға артық.
Мемлекеттік баж – азаматтарға көрсетілетін түрлі мемлекеттік қызметтердің құны. Бұл төлқұжат, жүргізуші куәлігі, жеке куәлік алу сияқты ресми құжаттарды рәсімдеу кезінде міндетті түрде төленеді. АЕК өскен сайын, бұл төлемдер де автоматты түрде көтеріледі.
2025 жылы төлқұжат алу үшін төленетін мемлекеттік баж 8 АЕК болса, 2026 жылдан бастап ол шамамен 31 600 теңге болады (3 952 × 8). Яғни, қазіргі шамамен 27 600 теңгемен салыстырғанда 4 000 теңгеге жуық өсім күтіледі.
Ал жүргізуші куәлігін алу үшін 1,25 АЕК көлемінде баж салығы төленеді. Бұл – 2026 жылы шамамен 4 940 теңге деген сөз. 2025 жылы бұл сома 4 312 теңге еді.
Егер сізге жақын арада төлқұжат немесе жүргізуші куәлігі қажет болса, 2025 жылдың соңына дейін рәсімдеп үлгерген дұрыс. Себебі 1 қаңтардан кейін баға автоматты түрде қымбаттайды. Осы орайда құжаттың мерзімі аяқталуға жақын болса немесе алдағы уақытта шетелге шығу, көлік жүргізу жоспарланса, өзгерістерді күтпей, қазірден қамданған жөн.
АЕК – Қазақстандағы қаржы жүйесінің маңызды индикаторы. Оның өсуі халықтың табысына да, шығынына да әсер етеді. Төлқұжат пен жүргізуші куәлігін алу құны қаңтардың бірінен бастап ресми түрде қымбаттайды. Сол себепті азаматтарға уақыт ұттырмай, қажет құжаттарды биыл рәсімдеп алған тиімді.
