Фото: Orda.kz
Алмалы аудандық сотында «қазақтың Робин Гуды» аталған Ілияс Сәриев пен Ақтоты Дүйсееваға қатысты сот үкімі шықты, деп хабарлайды Qazaq Today ақпарат порталы.
Төрағалық етуші судья Ернар Қасымбеков «Елге көмек» қайырымдылық қорының басшысы Ілияс Сәриевті ҚР Қылмыстық кодексінің 190-бабының 3-бөлігі 4-тармағы («Бірнеше рет жасалған алаяқтық») бойынша кінәлі деп танып, оған 4 жыл 8 ай бас бостандығынан айыру жазасын тағайындады.
Алайда Қазақстан Республикасы Конституциясының 30 жылдығына байланысты рақымшылық жасау заңы қолданылып, жазасының 5/1 бөлігі кешірілді. Түпкілікті жаза – 3 жыл 8 ай.
Сот «MM Travel» туристік компаниясының басшысы Ақтоты Дүйсееваны да осы бап бойынша кінәлі деп таныды. Оған 4 жыл 6 ай бас бостандығынан айыру жазасы тағайындалды.
Сотталушыға Қазақстан Республикасы Конституциясының 30 жылдығына байланысты рақымшылық жасау заңы қолданылып, жазасының 3/1 бөлігі кешірілді. Түпкілікті жаза – 3 жыл.
Судья ҚР Қылмыстық кодексінің 74-бабының 1-бөлігі бойынша Ақтоты Дүйсееваның баласы 14 жасқа толғанға дейін, яғни 2028 жылға дейін жазасы кейінге шегеру туралы шешім шығарды.
Сондай-ақ, жәбірленушілердің материалдық шығынды өтеу туралы талаптары қанағаттандырылды.
