Алматыда «Заң мен тәртіп: медиацияның қоғамдағы маңызы» атты ауқымды конференция өтті. Жиынның басты мақсаты – азаматтар арасындағы дауды сотқа жеткізбей, бейбіт жолмен шешу мәдениетін қалыптастыру.
Бұл шара – Алматы қаласы Ішкі саясат басқармасының қолдауымен жүзеге асқан арнайы жобаның қорытынды кезеңі. Ұйымдастырушылардың айтуынша, қоғамда медиация институтын дамыту қазіргі таңда өте өзекті.
Медиация – уақыт пен қаражатты үнемдеу
Жоба аясында бірнеше ай бойы халықтың құқықтық сауатын ашуға бағытталған іс-шаралар легі жүргізілді. Негізгі міндет – қарапайым тұрғындарға кез келген жанжалды өзара келісім арқылы шешудің артықшылықтарын түсіндіру болды.
Мамандардың сөзінше, медиация жүйесі сот жүктемесін азайтып қана қоймай, ағайын-туыс немесе серіктестер арасындағы сыйластықты сақтап қалуға мүмкіндік береді.
Қоғам мен билік бір арнада
Басқосуға қалалық прокуратура мен полиция департаментінің өкілдері, кәсіби медиаторлар, мемлекеттік қызметкерлер және қоғам белсенділері қатысты.
Жиын барысында қатысушылар «Медиация институтын дәріптеу» жобасының нәтижелерін талқылап, құқықтық мәдениетті одан әрі нығайту тетіктеріне тоқталды. Сондай-ақ, түрлі сала мамандары өзара тәжірибе алмасып, сұрақ-жауап форматында пікірлесті.
