Фото: Видеодан кадр
YouTube видеохостингі жас әрі шағын каналдарды қолдаудың мүлдем жаңа тәсілін іске қоспақ. Енді платформадағы миллиондаған қаралым жинау монополиясы бұзылуы мүмкін.
Made on YouTube конференциясында сервистің әзірлеушілері «Hype» деп аталатын жаңа функцияны таныстырды. Бұл құрал көрермендерге өздері ұнатқан, бірақ әлі кең таралмаған видеоларды трендке шығаруға мүмкіндік береді.
«Hype» кімдерге қолжетімді?
Бұл жаңалық әсіресе энтузиазмы бар, бірақ аудиториясы аз қазақстандық блогерлер мен контент мейкерлер үшін таптырмас мүмкіндік. Себебі «Hype» түймесі тек 500 мыңнан аз жазылушысы бар каналдарда жұмыс істейді.
YouTube сарапшылары арнайы сауалнама жүргізіп, қолданушылардың 75%-ы кішігірім каналдарға қолдау көрсетуге дайын екенін анықтаған. Әсіресе, жастар (зумерлер) жаңа есімдерді ашуға құштар.
Бұл қалай жұмыс істейді?
Бұрын видеоның тағдырын тек қаралым саны мен лайктар шешетін. Енді жүйе өзгереді:
-
Көрермен «Hype» түймесін басу арқылы видеоға дауыс береді.
-
Ең көп дауыс жинаған роликтер арнайы «100 үздік видео» рейтингіне шығады.
-
Бұл тізім жалпы трендтерден бөлек жүргізіледі.
Ескеретін жайт: дауыс беру тек соңғы 7 күнде жарияланған видеоларға ғана жүреді. Яғни, ескі видеоларды «хайп» жасау мүмкін емес.
Қазақстанға қашан келеді?
Әзірге компания бұл функцияны Түркия, Бразилия және Тайваньда сынақтан өткізіп үлгерген. Нәтиже жаман емес: бір айда қолданушылар 50 мыңнан астам каналға дауыс берген.
Әзірлеушілер функцияның басқа елдерде қашан іске қосылатынын нақты айтпады, бірақ жаһандық релиз алыс емес. Бұл – сапалы қазақша контент жасайтын жас буын үшін өз аудиториясын табудың төте жолы болмақ.
