Фото: The Guardian
Оңтүстік-Шығыс Азия елдері табиғи апаттың құрсауында қалды. Соңғы мәліметтер бойынша, алапат тасқын мен сел жүру салдарынан қаза тапқандар саны 500-ден асып жығылды. Қазақстан Президенті Қасым-Жомарт Тоқаев осы қайғылы жағдайға байланысты шұғыл үн қатты.
Бұл апта Индонезия, Таиланд және Малайзия үшін нағыз сынаққа айналды. Толассыз жауған муссон жаңбырларының соңы ірі гуманитарлық апатқа ұласты. The Guardian басылымының хабарлауынша, аймақтағы жағдай сағат санап ушығып барады.
Суматрадағы сұмдық: Жүздеген адам іздестірілуде
Апаттан ең қатты зардап шеккен аймақ – Индонезияның Суматра аралы. Мұнда табиғаттың тосын мінезінен 350-ден астам тұрғын ажал құшты. Құтқарушылар қираған үйінділер мен батпақ арасынан тірі қалғандарды іздеуде, алайда 279 адам әлі күнге дейін хабар-ошарсыз кеткендер санатында.
«Солтүстік Суматрада 166 адам, ал Батыс Суматрада 90 адам көз жұмды. Ачех провинциясында құтқарушылар тағы 47 мәйітті тапты», – делінген ресми деректерде.
Қазіргі таңда апат аймағында 3500-ден астам полиция қызметкері жұмылдырылған. 80 мыңға жуық адам қауіпсіз жерге көшірілді, бірақ жүздеген тұрғын әлі де көмекке мұқтаж.
«1,4 миллион үй зардап шекті»
Таиландта да жағдай мәз емес. Елдің оңтүстігіндегі Сонгкхла провинциясында су деңгейі 3 метрге дейін көтерілген. Бұл – соңғы онжылдықтағы ең жойқын су тасқыны.
Ресми деректерге сүйенсек, Таиландта табиғи апат 3,8 миллион адамның өміріне кері әсерін тигізді. 1,4 миллионнан астам үй су астында қалған немесе бүлінген. Үкімет 8 провинцияда 162 адамның қаза тапқанын растады.
Көршілес Малайзияда да нөсер жаңбырдың кесірінен екі адам қайтыс болып, Солтүстік Перлис штатының кейбір бөліктері су астында қалды.
Ақорданың реакциясы
Осы қайғылы оқиғаға байланысты Мемлекет басшысы Қасым-Жомарт Тоқаев шет қалмады. Президент көптеген адамның қаза болуына байланысты Индонезия басшысы Прабово Субиантоға және Таиланд Премьер-министрі Анутин Чарнвиракулға көңіл айту жеделхатын жолдады.
Мамандардың айтуынша, тропикалық дауылдар мен муссон маусымы (әдетте маусым-қыркүйек аралығы) биыл климаттық өзгерістерге байланысты ерекше қауіпті болып тұр.
