Маңғыстауда бес полиция қызметкері сотталып, қызметтік өкілеттігін асыра пайдаланды деп танылды. Олардың үшеуі 5 жылға бас бостандығынан айырылса, қалған екеуі шартты түрде 2,5 жылға сотталды. Бұл туралы Qazaq.today Lada.kz сайтына сілтеме жасап хабарлады.
Іс қалай басталды?
Оқиға 2024 жылдың 22 наурызында болған. Полицейлер өндірістік база аумағынан техника ұрлады деген күдікпен ер адамды ұстады. Тінту кезінде одан генераторлар табылған.
Күдікті өзіне танысы техниканы алуға рұқсат бергенін айтып, кінәсін мойындамады. Кейін ол жәбірленушіге айналып, тәртіп сақшыларын ұрып-соғу және азаптау фактісі бойынша айыптады.
Бір жылдан астам уақыт өткен соң, үшінші сот отырысы бұл іске нүкте қойды.
Жәбірленушінің позициясы
Зигмунд Азизли сот үкімін тым жеңіл деп санайды:
«Апелляциялық шағым түсірдім, прокуратураға да жаздым. Әділдік іздеймін. Есікті ұстаған адам кемінде бес жыл түрмеде отыруы керек. Ал мені ұрып-соққандарға бес жылдан жоғары жаза берілуі тиіс еді. Олар кінәсін мойындаған жоқ, өкінбеді. Соған қарамастан ең төменгі жаза кесті», — деді ол.
Оның айтуынша, азаптау камера орнатылмаған «қараңғы кабинетте» болған.
Полицейлердің туыстары не дейді?
Сотталғандардың жақындары олардың кінәсі жоқ екенін алға тартуда. Полицейдің әйелі Екатерина Новоселова бейнежазбаларда күйеуінің күдіктіні ұрмағаны анық көрінеді дейді:
«Камера жазбасында оның өзі дауыс көтеріп, әдепсіз сөздер айтып отырғаны анық. Жолды жауып, күйеуімді күртешесінен ұстап алғаны көрінеді. Сондықтан азаптады деген айып негізсіз», — деді ол.
