Талдықорғанда Шерзат Болаттың өліміне қатысты өтіп жатқан сот процесінде айыпталушы Дархан Әскентайдың қорғаушысы сотқа бірнеше өтінішхат түсірді, деп хабарлайды Qazaq Today ақпарат порталы.
Адвокат Ержанов тергеу барысында Әскентайға қысым көрсетілгенін алға тартып, оқиға орын алғаннан кейін оны тексерген дәрігерлерді сотқа куә ретінде шақыруды сұрады. Оның айтуынша, тергеу кезінде заңсыздықтар орын алып, айыпталушыға медициналық көмек дер кезінде көрсетілмеген.
«Дархан Әскентайдың бет тұсынан соққы алғаны жөнінде медициналық сараптама Алматы облысы Талғар аудандық ауруханасында жүргізілген. Бірақ қажетті ем-дом көрсетілмей, жағдайы нашарлаған. Көзінің астындағы сүйегі сынып, көзі іріңдеген. Тергеу кезінде денсаулығы ескерілмей, 28 күн бойы емделмей, жауап алынды. Сондықтан Қонаев қаласындағы уақытша ұстау изоляторының басшысын да сотқа куә ретінде шақыруды сұраймыз», – деді қорғаушы.
Сонымен қатар жәбірленуші тараптың заңды өкілі Қаржаубай Нұрымовтың бұған дейінгі жауаптарынан кейін, қорғаушы оның қойған сұрақтарына толық жауап бермегенін айтып, оны қайта тыңдауды және қосымша куә – Әскентайдың жездесі Ринатты да сотқа шақыруды ұсынды.
Судья Ержан Жанұзақов адвокаттың бірнеше өтінішхатын назарға алып, оларды ашық қалдырды. Алдымен айыпталушы Дархан Әскентайдан жауап алынатынын айтты.15:35
