Украина Президенті Владимир Зеленский Ресей басшысы Владимир Путиннің 7-9 мамыр аралығында үш күндік бітім жариялау туралы ұсынысын қабылдамады. Бұл жайында Euronews пен Qazaq.today ақпарат көздері хабарлады.
Зеленский: «Бұл — тек театр»
3 мамыр күні өткен баспасөз мәслихатында Зеленский:
«Олар 7-сіне дейін бізді өлтіреді, сосын өздеріне жайлы екі-үш күн алады, ал 11 мамырда қайтадан зымыранмен шабуыл жасайды. Мұны шынайы ұсыныс деп қабылдамаймын. Бұл жай ғана «театралды қойылым»», — деді.
Украина не ұсынады?
Зеленский америкалық тарап ұсынған үлгіге сүйене отырып, кем дегенде 30 күнге созылатын шартсыз бітім жариялауды ұсынды.
«Неге 30 күн? Себебі үш, бес не жеті күнде ештеңеге келісе алмаймыз», — деп түсіндірді ол.
Парадқа келетін әлемдік көшбасшылар туралы
Украина Президенті сондай-ақ 9 мамырда Мәскеудегі парадқа келетін шетелдік басшылардың қауіпсіздігіне кепілдік бере алмайтынын айтты:
«Біз Ресейде не болатынын білмейміз. Олар өздері бір әрекет жасап, кейін бізді айыптауы мүмкін. Сондықтан ешқандай кепілдік бермейміз», — деді Зеленский.
Кремльдің ұстанымы
Ресей бұған дейін, 28 сәуірде, Жеңістің 80 жылдығына орай 7 мамыр 00:00-ден 11 мамыр 00:00-ге дейін бітім жариялайтынын мәлімдеген болатын. Кремль Украина да бұл ұсынысты қабылдауы тиіс деп мәлімдеді.
Ал АҚШ не дейді?
Ақ үй АҚШ Президенті Дональд Трамптың Ресей мен Украина арасында тұрақты бітім орнағанын қалайтынын жеткізді.
Ал Зеленский болса, бұл ұсынысты «манипуляция жасау әрекеті» деп бағалады. РФ президентінің баспасөз хатшысы Дмитрий Песков Украина басшысының ұсынысына қатысты пікір білдіріп, мұндай мәселеде «нақты жағдайларды ескеру маңызды» екенін атап өтті.
Бұған дейінгі тәжірибе
Еске сала кетсек, Путин Пасха мерекесі кезінде де бітім жариялаған (19 сәуір 18:00-ден 21 сәуір 00:00-ге дейін). Бірақ кейін екі тарап бірін-бірі бітім бұзды деп айыптаған болатын.
