РОО «Қазақстан авторлық қоғамының» бас директоры Айнұр Есендікова 400-ден астам авторлар мен орындаушылар, оның ішінде бірінші қатардағы жұлдыздар да өз музыкаларының пайдаланылуы үшін гонорарларын әлі күнге дейін алмағанын мәлімдеді. Себебі – кері байланыстың болмауы, деп хабарлайды Qazaq.today.
«Авторлық және сабақтас құқықтар туралы заңға сәйкес біз авторлар мен құқық иелерін іздеуге міндеттіміз. Осы мақсатта біздің сайтымызда ресми тізім жарияланған – бұл заң талабы», – деп түсіндірді Есендікова брифингте.
Ұйым қызметкерлері әртістермен барлық мүмкін жолдар арқылы байланысуға тырысады, бірақ жауап әрдайым келе бермейді.
«Кейбір орындаушылар байланысқа шығады, бірақ кейде қиындықтар туындайды. Көпшілігінің менеджерлері не продюсерлері бар, олар кейде бізді алаяқтар деп ойлап, жауап бермейді. Бұл бүкіл процесті тежейді», – деді Есендікова.
«Біз мессенджерлер, Instagram, Telegram, WhatsApp арқылы жазамыз, қоңырау шаламыз. Бірақ, өкінішке қарай, көбінесе жауапсыз қаламыз. Сондықтан барлық құқық иелеріне үндеу жасағым келеді: егер бізден хабарлама көрсеңіздер – жауап беріңіздерші. Біз сіздерге тиесілі қаражатты шын мәнінде бергіміз келеді», – деп қосты KazAK басшысы.
Бұған дейін қоғам назарын тізімде байланыс деректері ашық қолжетімді әртістердің де бар екендігіне аударған. 2024 жылы жарияланған тізімде 421 автор бар, олардың қатарында Димаш Құдайберген, Әли Оқапов, Иманбек, Darkhan Juzz, Қайрат Нұртас, Raim & Artur, Rin’Go, Sadraddin, Say Mo, Son Pascal, M’Dee, V$XV PRiNCE, Ғалымжан Молданазар және басқалар бар. Сондай-ақ, бұл тізімде шетелдік орындаушылар да кездеседі.
