Оқиға кеше, 2 сәуір кешкі мезгілде сағат 19:05 — 23:00 аралығында болған. Бейнеу аудандық орталық ауруханасының қабылдау бөліміне 9-12 жас аралығындағы 11 бала жедел-жәрдеммен жеткізілген, деп хабарлайды Qazaq Today ақпарат порталы.
Бейнеу ауданы әкімі баспасөз қызметінің хабарлауынша, балалар 2,3 және 5-сынып оқушылары. Барлығы да дәрігерлердің тексеруінен кейін үйлеріне жіберілген.
«Дәрігерлер қарап, балаларды үйлеріне қайтарды. Ауруханаға жатқызылғандар жоқ. Қазіргі уақытта оқушылардың денсаулығы бірқалыпты, амбулаторлық бақылауда», — делінген хабарламада.
Ал Бейнеу аудандық санитариялық-эпидемиологиялық бақылау басқармасының мамандары осы оқиғадан кейін, жедел тергеп-тексеру жүргізіп, азық-түліктерден сынамалар алған. Оқушылардың неден ауырғанын анықтау үшін, санитариялық профилактикалық іс-шаралар жүргізіліп жатыр.
