Жетісу оьлысында қызыл кітапқа енген қарақұйрықтарды заңсыз аулағаны үшін орманшылар сотталды, деп хабарлайды Qazaq Today ақпарат порталы.
Қаратал аудандық соты сирек кездесетін жануарларды заңсыз аулау ісі бойынша үкім шығарды. «Үштөбе орман шаруашылығы» КММ-нің үш қызметкері азаматтық тұлғамен бірлесіп, «УАЗ» қызметтік көлігін пайдаланып, орман шаруашылығы аймағында Қызыл кітапқа енген қарақұйрықтарды заңсыз аулағаны анықталды.
«Соттың үкімімен ұсталғандардың барлығы ҚР ҚК-нің 337-бабы (заңсыз аңшылық) бойынша кінәлі деп танылып, 3 жылға бас бостандығын шектеу жазасына кесілді.
Сотталушылар мемлекетке келтірілген 7 миллион теңгеге жуық залалды толық өтеді», — деп хабарлады Жетісу облыстық прокуратурасының баспасөз қызметі.
Сот үкімі заңды күшіне енді. Прокуратура қоршаған ортаны қорғау заңнамасын сақтаудың және сирек кездесетін жануарларды қорғаудың маңыздылығын еске салды.
Осындай құқықбұзушылықтар анықталған жағдайда, дереу құқық қорғау органдарына хабарлауға шақырамыз.
