Алматы-Өскемен тасжолында 18 көліктің қатысуымен жаппай жол апаты болды. Қуанышқа орай, зардап шеккендер мен құрбандар жоқ. Оқиға 5 қаңтар күні таңертең Алматы-Қонаев бағытының 28-шақырымында орын алған, деп хабарлайды Todayinfo.kz.
Апаттың себептері
Алдын ала мәліметтер бойынша, жол-көлік оқиғасына қалың тұман, көріну деңгейінің төмендігі, сондай-ақ жүргізушілердің жылдамдық режимі мен қауіпсіз қашықтықты сақтамауы себеп болған. “ҚазАвтоЖол” дерегіне сәйкес, жолдың бұл учаскесі IА техникалық санатына жатады, алты жолақты, әрі жол бетінде ақаулар болмаған.
Бұған дейінгі оқиғалар
Бұл оқиға Қазақстан жолдарындағы жалғыз ірі апат емес. 3 қаңтарда Ақмола облысы, Бұланды ауданында «Астана-Петропавл» автожолында орын алған жол апаты да елді дүр сілкіндірген еді. Апаттың салдарын жою үшін ТЖМ, ІІМ және жол қызметтерінің 152 қызметкері мен 68 техникасы жұмылдырылды.
Құтқару жұмыстары
Ақмола облысындағы апат кезінде 86 адам, оның ішінде 14 бала эвакуацияланды. 21 адам медициналық көмекке жүгінді, 11-і ауруханаға жатқызылды. Жылыту пункттері ашылып, зардап шеккендерге ыстық тамақпен көмек көрсетілді.
