Шымкенттік әйел қан қысымын түсіру үшін куркума қосылған сірке суын ішіп, ауыр халде ауруханаға түсті, деп хабарлайды Qazaq Today ақпарат порталы.
Шымкенттегі №2 қалалық аурухананың бас дәрігері Бақытжан Позиловтың айтуынша, әйел кеңесті интернеттен алған.
«53 жастағы әйел интернеттен кеңес алып, қан қысымын төмендету үшін куркума мен алма қосылған сірке суын ішкен. Салдарынан анафилактикалық шокқа түсіп, ауыр халде ауруханаға жеткізілді. Диагностика: Лайелла синдромы – аллергиялық буллезді дерматиттің ең ауыр түрі», – деді дәрігер.
Дәрігердің айтуынша, науқас екі күн бойы ауыр жағдайда болды. Бақытымызға орай, дәрігерлердің күш-жігерінің арқасында әйел аман қалды.
«Халықтық емдеу әдістері кейде тиімсіз және денсаулығыңызға үлкен зиян келтіруі мүмкін. Абайлаңыз, бұл науқас, бақытымызға орай, аман қалды», – деді Позилов.
