Алматыда ертең кәсіпқой бокс кеші өтеді. Жеңіліс дәмін татпаған Жанқош Тұраров (26-0, 18 КО) бірінші жартылай орта салмақтағы (63,5кг) қазіргі ІВО белбеуінің иегері Алехандро Менесеспен (16-5, 9 КО) жекпе-жекке шығады.
Мексикалық былғары қолғап шебері елімізге атағын қорғауға келген алғашқы әлем чемпионы болмақ. Менесес, былтыр Ливерпуль қаласында жеңілмеген жергілікті боксшы Сэм Максвеллді уақытынан бұрын ұтып, сенсация жасады. Ол ағылшын фандарының мақтанышының 16-0 деген таза рекордын бұзып, IBO белбеуін еншілеген болатын.
«2022 жылдың желтоқсанында Тұраров өз алаңында испаниялық боксшы Луис Энрикені жетінші раунда техникалық нокаутпен тізе бүктіріп IBO Inter-Сontinental титулын иеленген еді.
Бұл бокс кешін әйгілі DAZN платформасы тұңғыш рет Қазақстаннан тікелей трансляция арқылы ұсынды. Осы жарқын жеңісінен кейін Жанқош IBO-ның негізгі чемпиондық белбеуіне басты үміткер атанып, әлем бойынша өз дивизионындағы Boxrec рейтингінде 38 орынға көтерілді», — деп хабарлады SPORTNAMA agency ұйымы.
Аталмыш белбеуге нөмері бірінші үміткер Жанқош, енді ел тарихында чемпион атанған жетінші қазақстандық кәсіпқой боксшы болуды көздейді. 21 наурыз күні Тұраров пен Менесестің чемпиондық жекпе-жегін DAZN эфирі арқылы әлемнің 100 шақты мемлекеті тамашалай алады, ал қазақстандық спорт сүйер қауымға «Хабар» телеарнасында сағат 20:00-ден бастап тікелей көрсетілім ұсынады.
Сонымен қатар бұл кеште Абылайхан Құсайынов, Дәурен Елеусінов, Бекман Сойылбаев, Балауса Мұздиман секілді өзге де қазақстандық боксшылар жұдырықтаспақ.
Кәсіпқой бокс кеші 21-наурызда, кешкі сағат 17:00-де Алматы Арена кешенінде басталады.
Qazaq.today
