2025 жылдың 1 қаңтарынан бастап Қазақстанда республикалық бюджеттен және мемлекеттік әлеуметтік сақтандыру қорынан төленетін жәрдемақылардың мөлшері ұлғаяды. Бұл өзгерістер кімдерге әсер етеді және жаңа жәрдемақылар қандай болатыны туралы толығырақ түсіндіріп береміз.
Еңбек және халықты әлеуметтік қорғау министрлігінің мәліметінше, «2025-2027 жылдарға арналған республикалық бюджет туралы» заң жобасына сәйкес, ең төменгі күнкөріс деңгейінің өзгеруіне байланысты республикалық бюджеттен төленетін мүгедектік, асыраушысынан айырылу және арнайы кәсіби мемлекеттік жәрдемақылар мөлшерін 6,5 пайызға арттыру жоспарлануда.
Сондай-ақ, 2025 жылдың 1 қаңтарынан бастап мемлекеттік әлеуметтік сақтандыру қорынан төленетін еңбекке жарамсыздық және асыраушысынан айырылу жағдайларына байланысты әлеуметтік төлемдер де 6,5 пайызға өседі.
Жаңа жәрдемақылар келесідей болады:
- Мүгедектік бойынша мемлекеттік әлеуметтік жәрдемақылар (ең төменгі күнкөріс деңгейіне байланысты):
- I топтағы мүгедектерге – 101 702 теңге;
- II топтағы мүгедектерге – 81 362 теңге;
- III топтағы мүгедектерге – 55 474 теңге;
- Балалар мүгедектігі: I топтағы балаларға – 101 702 теңге, II топтағы балаларға – 84 598 теңге, III топтағы балаларға – 74 428 теңге.
- Асыраушысынан айырылу жағдайында мемлекеттік әлеуметтік жәрдемақылар (ең төменгі күнкөріс деңгейіне байланысты):
- Бір адамға – 42 530 теңге;
- Екі адамға – 78 588 теңге;
- Үш адамға – 104 013 теңге;
- Төрт адамға – 120 193 теңге;
- Бес адамға – 127 127 теңге.
- Арнайы кәсіби мемлекеттік жәрдемақылар (ең төменгі күнкөріс деңгейіне байланысты): 92 456 теңге.
- Мемлекеттік арнайы жәрдемақылар (айлық есептік көрсеткішке байланысты):
- I тізім – 37 040 теңге;
- II тізім – 32 951 теңге.
2025 жылдың республикалық бюджетінде 42 түрлі әлеуметтік төлемге 6 триллион 26 миллиард теңге бөлінген.
Сонымен қатар, мамандар Қазақстандағы әлеуметтік төлемдер мөлшерінің инфляцияға сәйкес келмейтінін айтып, бұл жүйені жетілдіру қажеттігін атап өтті. Алдағы уақытта әлеуметтік төлемдерді тағайындау жүйесін оңтайландыру мақсатында цифрлық шешімдер енгізілмек.
