Алматы облысындағы мектеп директорының жеке дәретханасынан Оқу-ағарту министрі Ғани Бейсембаев хабардар. Министр бұл даулы істі анықтайтынын хабарлады. Ол мектептердегі сыртқы дәретхана мәселесі қалай шешіліп жатқанын да айтып берді.
«Алматы облысы Төңкеріс ауылында түсірілген видео әлеуметтік желіге тарады. Онда мектеп директоры өзінің жеке дәретханасын ашып алған. Ал жүзден астам мұғалім бір әжетханаға барады. Бұл оқиғадан хабарыңыз бар ма?», – деп сұрақ қойды тілшілер.
Министр бұл бір ғана жағдай екенін және мәселені білім басқармасы қатаң бақылауда ұстап отырғанын айтты.
«Бірінші анықтап алайық. Оқиғаның қаншалықты рас екені, өндіріске, білім сапасына, мектеп жұмысын үйлестіруге келтірілген басқа да залалдары анықталса, тиісті қатаң шаралар қолданылады. Тексеру соңын күткен дұрыс деп ойлаймын», – деп жауап берді Оқу-ағарту министрі.
Жалпы мектептегі дәретхана тақырыбы үнемі қоғам наразылығын тудырып келеді. Министр жаңа оқу жылында сырттағы дәретханалар толығымен жойылатынын айтты. Оның сөзінше, 2021 жылы мектеп сыртындағы дәретханалар саны 2 700 болса, бүгінгі күні атқарылған іс-шаралар нәтижесінде 10 әжетхананың ғана сыртты орналасқаны анықталып отыр.
