Ақтөбе, Qazaq.Today – Ақтөбелік кәсіпкер Қуандық Әлішев ауыр сырқатқа шалдыққаннан кейін қала іргесіндегі зираттан өзіне орын алып, құлпытас орнатты. Бұл туралы Qazaq.Today ақпарат агенттігі хабарлайды.
Кирпичный тұрғын алабының жанындағы үлкен зиратта 2022 жылы кәсіпкердің есімі жазылған құлпытас қойылған. Әкімшілік мәліметіне сәйкес, бұл орын Қуандық Әлішевке тиесілі.
“Кәсіпкер бейіт құрылысын 2022 жылдан бастады. Оның жасы келген. Қандай болатынын алдын ала көргісі келген болар. Құрылыс бар-жоғы 2-3 айда аяқталды. Бұл жер сол кісіге тиесілі. Бейіт құрылысында гранит пайдаланылды. Бұған дейін тағы бір адам алдын ала өзіне орын дайындаған еді. Бірақ ол қайтыс болып, сол жерге жерленді. Мұндайды көбіне қарт адамдар жасайды. Оларға тыйым салуға болмайды. Жерлейтін орындар сатылмайды,” – дейді Кирпичный тұрғын алабындағы зираттың әкімшісі Сәбит Дүйсенов.
Оның айтуынша, адамдар әдетте қайтыс болғаны туралы куәлік әкеледі. Содан кейін ғана орын бөлінеді. Жер тегін берілгенімен, бейіт қазу қызметі 90 мың теңге тұрады.
Кәсіпкер Қуандық Әлішев өзінің құлпытастың оң жағына «Бақытты өмірдің белгілері: абырой, балалар», ал сол жағына «Мақсатың – үздіксіз ізденіс, беймаза өмір» деп жаздырған.
“Менің жасым 86-да. Екі жыл бұрын қаңтар айында құлап, бел омыртқамды сындырып, ұзақ жаттым. Сол кезде өз балаларымдай болып кеткен басшылар келіп денсаулығымды сұрады. «Ағаларың өлетін сияқты, жүре алмайды. Орын берсеңіздер, Алматыда балаларым, бауырларым бар, жақын достарым да көп. Олар бәрін жасап береді» дедім. Зираттағы жерді өзім таңдадым, төбеде орналасқан. Маған орын берген адамдарды кінәлаудың жөні жоқ,” – дейді кәсіпкердің өзі.
Қуандық Әлішев – Ақтөбе облысы Темір ауданының тумасы. Ол Алматыдағы зооветеринария институтын бітіріп, ғылыми еңбектер жазған. Әлішев ерекше түсті қаракөл терісін алу әдісін ұсынды. Осы уақытқа дейін оның спирт зауыты, шошқа фермасы, құс цехы болды. Қазір көпқабатты үйлер салып жатыр.
Бұған дейін әнші Өктем Алтаев бір кездері зират тазалаушы болып жұмыс істегені жайлы айтқан болатын.
