Су тасқыны жағдайы туралы соңғы ақпарат шықты. Сағат 10:00-дегі мәліметке қарағанда, су тасқыны басталғалы бері 96 472 адам құтқарылған. Су тасқыны кезіндегі шығынды барынша азайту бойынша қабылданған шаралардың нәтижесінде Ауыл шаруашылығы министрлігінің облыс әкімдіктерімен бірлескен әрекетімен 88 мыңнан астам ауыл шаруашылығы жануары қауіпсіз аумаққа айдалып шығарылды.
Жедел деректер бойынша өлген мал саны 8,1 мың бас, оның ішінде ұсақ мал – 6 мың, ірі қара – 1,5 мың, жылқы – 514 бас. Республикалық эпизоотияға қарсы отряд тұрақты эпизоотиялық жағдайды сақтау мақсатында жануарлардың өлекселерін жою жұмыстарын қарқынды жалғастыруда, – делінген Ауыл шаруашылығы министрлігінің ресми сайтында. Бүгінгі таңда 4,1 мың бас өлген мал жойылған. Премьер-Министрдің тапсырмасы бойынша бұл жұмыс күшейтілген режимде жалғасатын болады. Су тасқынына қарсы іс-шараларды үйлестіру және су тасқыны кезеңінің зардаптарын жою жөніндегі республикалық штабпен өлген мал иелеріне өтемақы төлеу алгоритмі әзірленіп, бекітілді. Меншік иелері мен залалды анықтау және басқа да мәселелерді шешу үшін өңірлерде жергілікті атқарушы органдармен шығынды анықтау жөніндегі комиссиялар құрылды.
«Су тасқыны салдарынан өлген ауыл шаруашылығы жануарларының иелері малдары туралы мәліметтерді көрсете отырып, жергілікті комиссияға өтініш беруі керек. Ауыл шаруашылығы жануарларына меншік құқығы комиссиялардың актілерімен расталады. Меншік иелеріне өтемақы мөлшері Ұлттық статистика бюросы жариялаған жануарлардың түрлері, жынысы мен жас шамасы бойынша нарықтық құны туралы мәліметтер негізінде айқындалатын болады», – делінген хабарламада.
Жалпы, су тасқынынан зардап шеккен аймақтардағы эпизоотиялық жағдай, сондай-ақ ауыл шаруашылығы жануарларының иелеріне келтірілген шығынды өтеу мәселелері Ауыл шаруашылығы министрлігінің тұрақты бақылауында.
- Уақытша орналастыру пунктеріне 7 605 адам, оның ішінде 3 474 бала орналасты. 82 559 мал қауіпсіз жерге апарылды;
- Зардап шеккен өңірлерге 167 935 келі гуманитарлық көмек жеткізілді;
- Апаттық-құтқару жұмыстарына 24 295 адам, 2 651 техника, 10 тікұшақ тартылды;
- Атырау, Ақтөбе, Ақмола, Қостанай, Солтүстік Қазақстан облыстарында 3 444 жеке тұрғын үй, 339 аула аумағы су астында қалды;
- Су шайған 105 автожол, оның ішінде 8 көпір мен 97 жол төсемі бақылауда тұр.
