Фото: altyn-orda.kz
Қаржы сарапшысы, қоғам қайраткері Сәбит Рысбаев Facebook парақшасында қазіргі таңдай әлеуметтік желіде ақпараттық хаос болып жатқанын, су тасқынына байланысты халық кейбір расталмаған ақпаратқа сенетін жазды, деп хабарлайды Qazaq Today ақпарат агенттігі.
«Қазіргі уақытта әлеуметтік желіде байбалам көбейіп кетті. Қайсы ақпараттың рас, қайсысы жалған екенін де біле алмай қалдық. Айдың күннің аманында өткенде Тараздағылар шулап жатыр. Қырғыздан келетін су қаланы алады екен дегендей. Оған кейде блогерлер де ілігіп алады. Кезіндегі коронавирусты ұшақпен шашып жүр деп әңгіме айтқандай.
Негізі мұндай кезде керісінше бірігіп жұмыс істеген дұрыс. Кінәлі адамдар міндетті түрде табылады. Жазаланады. Ешкім ешқайда қашып кетпес. Ең басты байлық азаматтарымыздың өмірі. Денсаулығы. Бәрін қалпына келтіреміз деп отыр. Үлкен компаниялар жәрдем жіберуді бастап кетті. Блогерлер болмаса белгілі бір аудиториясы бар адамдар сенімді ақпаратпен бөліссе. Осы топан сумен бірігіп күресуге шақырса деп ойлаймын. Бұл да бір табиғаттың мінез көрсетіп жатқаны болар. Құдай қаласа бұдан да өтерміз. Бас аман болсын», — дейді Сәбит Рысбаев.
