Әр бала бақытты болуға лайық!

Бүгін, 25 тамызда Республикалық «Балалар инклюзивті академиясы» қоғамдық бірлестігінің Батыс Қазақстан облысындағы филиалында ерекше балаларға арналған  АРТ терапия үйірмесі мен мамандандырылған түзету-дамыту орталығы ашылды.

Орталықта балалар тегін инклюзивті, арнайы спортпен және шығармашылықпен айналысады.

Өз жұмысын бастауға дайын оқу орталығының ашылу салтанатына Батыс Қазақстан облысының мәдениет, тілдерді дамыту  және архив ісі басқармасының бөлім басшысы Кенжин Нұрлан Серікұлы арнайы келді. Сонымен бірге, Еңбек және әлеуметтік қорғау комитетінің  Батыс Қазақстан облысы бойынша департаменті басшысының орынбасары  Дильдаш Искакова, Орал қаласының психологиялық — дәрігерлік  педагогикалық кеңес беру мекемесінің басшысы Узыпа Сатыбалдиева келіп қатысты.

Орталықта логофел, дефектолог, психолог, дене шынықтыру мамандары жұмыс істейді. Республикалық «Балалар инклюзивті Академиясы» БҚО филиалы жетекшісі Күнайым Рабайдың айтуынша, бүгінгі таңда орталыққа 72 бала келген.

«Алдағы уақытта 96 баланы қабылдау жоспарда бар»,- дейді ол.

Шара барысында балалар клубының мүшелері өнер көрсетіп, ән-биден шашу шашты.

Жаңа орталықтың жандануына облыстың бірқатар азаматы үлес қосып, жабдықтар сыйлады. Атап айтсақ, Әл-Фараби оқу-өнер орталығының директоры Молдагалиев Асхат Есенұлы оқу бөлмесін  парта-орындықпен жабдықтады, «Ғибадат» жауапкершілігі шектеулі серіктестігінің қожайындары ағайынды Біржан мен Ержан Марякұлы 10 баланың киімін ілуге арналған шкаф, шахмат үстелі, балалардың жүріп-тұруына қолайлы арба т.б. жабдықтарды сыйға тартты.

«Уральсктойс» ақыл-ойды дамытатын ойыншықтар дүкенінің меңгерушісі Нагимова Алтынгүл Азаматқызы болса логопед, дефектолог мамандарға қажетті құралдар алып берді. Қала тұрғыны Тлеушов Нұрлан Халиоллаұлы орталыққа мольберд тақта сыйлады, тағы бір тұрғын жүгіруге арналған техниканы тарту етті.

Ерекше балаларға арналған оқу орталықтарын ашу идеясы, жобаның авторы «Үздік педагог» Нұрғалиев Нұрым атты азаматқа тиесілі. Қазіргі күні мұндай орталықтар Алматы, Қостанай, Рудный қалаларында жұмыс істеп тұр.

 

Qazaq.today