Мәжілістің экс-спикері Нұрлан Нығматулиннің ұлы Нұрхан Нұрланов қылмыстық іс бойынша айыпталушы атанды. Бас прокуратураның мәліметінше, «Қазфосфат» ЖШС басшылығының 697 млн теңге көлемінде монополиялық кірісті заңсыз алуына байланысты сотқа дейінгі тергеу басталған. 15 Шілдеде Мәжілістің экс-спикері Нұрлан Нығматулиннің ұлы қылмыстық іс бойынша айыпталушы екені жарияланды. Ал 5 сәуірде монополияға қарсы қызметкерлер «Қазфосфат» ЖШС-ға қатысты үлкен сұранысқа ие ауыл шаруашылығы тыңайтқыштарының бірі – аммофос бағасын негізсіз көтеру фактісі бойынша тергеудің басталғаны туралы мәлімдеген еді.
Мәжілістің бұрынғы Төрағасы Нұрлан Нығматулиннің ұлдары – Нұрхан мен Нұржан «Қазфосфат» ЖШС-нің ауылшаруашылығы тыңайтқыштарының бағасын көтеруден пайда тапқаны белгілі болды. Осы тергеу бойынша қылмыстық іс қозғау үшін монополияға қарсы мамандар материалды құқық қорғау органдарына берді.
Өз кезегінде ауыл шаруашылығы тыңайтқыштарының бағасы елдегі тамақ өнімдерінің құнына тікелей әсер етеді. 14 шілдеде Үкіметтің кеңейтілген отырысында Президент Қасым-Жомарт Тоқаев «Қазфосфаттың» заңсыз кірісі туралы да айтқан. Бұл «Қазфосфаттың» заңсыз әрекетіне қатысты жалғыз дерек емес.
Зауытта соңғы жылдары адам шығыны да көбейген. 7 маусымда «Касфосфаттың» өндіріс ошағында жұмысшы қаза тапты. Аталған факті бойынша қылмыстық іс қозғалды. 2 шілдеде зауытта қайғылы жағдай тағы қайталанды. Бұл жолы бірден екі жұмысшы көз жұмған. Тағы бір адам 7 шілдеде қайтыс болды. Осылайша, бір ай ішінде үш түрлі жағдайда «Қазфосфатта» төрт адам қайтыс болды.
11 шілдеде Тараз қаласының атмосферасын азот диоксиді мен күкіртсутегі заттарының ластағаны туралы жағдай тіркелді. Шаһардағы ауаның химиялық ластану көзі – «Қазфосфат» зауыты болды, апаттан кейін сутегі фторидінің үш есе артуы анықталды. Бір қызығы, 12 шілдеде Экология, геология және табиғи ресурстар министрлігі «Қазфосфаттың» ауаны ластағаны туралы өз мәлімделеріне қарсы келіп, зауыттағы күкіртсутегінің мөлшері нормадан асып кеткендігін жоққа шығарды.
