Алматыдағы Оқушылар сарайы бір ай бойы оқушыларға робототехника, дрондарды басқаруды тегін үйреді. Оқушылар сарайы қайта жөндеуден соң бүгінде өз дамуының жаңа кезеңіне өтіп жатыр, деп хабарлайды Qazaq.today ақпараттық агенттігі. Алматы әкімдігінің қолдауымен жобалық кеңсе аясында осынау қосымша білім беру мекемесі өз тарихында ауқымды модернизацияланудың екі кезеңін іске асырды және өз қызметін кеңейтті. Нысанның алаңы 35 мың шаршы метрден асады.
«Қала оқушылары үшін зымыран жасау және аэроорталық, планетарий, VR және дрондарды басқару зертханасы, физика, химия, биология және гидропоника бойынша ғылыми зертханалар, сондай-ақ робот жасау, IT-бағдарламалау және басқа да ұшыру алаңдары бойынша үйірмелер ашылды. Сондай-ақ, спорттық, көркемдік, әлеуметтік-педагогикалық бағыттағы жаңа үйірмелер іске қосылды. Бұл пайдалы үйірмелер енді аптасына 15 мыңнан астам алматылық оқушыны, ал күніне 3000 – ға жуық баланы қабылдай алады. Модернизацияланудан кейінгі Оқушылар сарайының жобалық қуаты осындай», -деп хабарлады Алматы қаласы әкімдігінің баспасөз қызметі.
Айта кетерлігі, Оқушылар сарайы 1983 жылы салынған тарихи маңызы бар сәулет нысаны болып табылады.
2019 жылы Алматы әкімдігінің қаулысына сәйкес Оқушылар сарайына туристер мен натуралистер станциялары, №12 балалар музыкалық мектебі және №4 джаз балалар музыкалық мектебі өздерінің материалдық базасымен және қаржыландыруымен қосылды.
Өткен жылы Алматы әкімі Ерболат Досаевтың тапсырмасымен скверді абаттандыру жұмыстары аяқталды. Сыртқы жарықтандыру ауыстырылды, жаңа ағаштар мен гүлзарлар отырғызылды, көгалдандыру жүргізілді, суару жүйесі тартылды, жабындылар төселді. Сондай-ақ жаңа орындықтар мен урналар орнатылып, субұрқақ салынды.
