«Астана ЭКСПО-2017» компаниясынан қаражат жымқыру ісі бойынша 14 жылға бас бостандығынан айырылған Талғат Ермегияевтың түрмеде немен айналысатыны белгілі болды. Жазасының жартысын өтеп қойған Талғат Амангелдіұлы түрмеде бокспен айналысып жүр, деп хабарлайды Qazaq.today ақпараттық агенттігі.
Әлеуметтік желіге тараған видеода оның бокстасып жатқаны көрсетілген.
Қылмыстық-атқару жүйесі комитетінің Алматы облысы бойынша департаменті (ҚАЖД) бейнежазбаға түсініктеме берді. Ведомствоның мәліметінше, видео 2019 жылы Алматы облысы ҚАЖ мекемесі жасақтарының бірінде түсірілген.
«Видеодағы адамдар 2021 жылдан бері бір-бірінен бөлек камерада орналасқан. Кейінірек олардың бірі колониядан босап шықты», — деді ведомство өкілдері.
ҚАЖД мәліметінше, 2021 жылдың наурызында мекемедегі тінту іс-шаралары барысында спорттық құрал-жабдықтар тәркіленіпті.
«2022 жылы 29 наурызда осы видеоның тарауына байланысты сотталғандар жазасын өтеп жатқан камераларды аралап шықты — қандай да бір тыйым салынған заттар табылған жоқ. Анық-қанығын білу үшін қызметтік тергеу басталды, оның нәтижелері бойынша тиісті шаралар қабылданатын болады», — делінген Алматы облысы бойынша ҚАЖД баспасөз қызметінің хабарламасында.
